Shumica prej nesh nuk arrijnë të përqendrohen. Ndiejmë vazhdimisht një kaos mendor acarues, sepse përpiqemi të mendojmë shumë gjëra njëkohësisht. Gjithë kohën mendja jonë është e tejmbushur.
Ish-trajneri i Dallas Cowboys, Jimmy Johnson, u mbajti një fjalim motivues interesant mbi këtë çështje lojtarëve të tij të futbollit, gjatë pushimit të ndeshjes, në Ligën e Futbollit Kombëtar Amerikan, më 1993:
‘U thashë atyre se nëse do t’iu vendosja një dërrasë në dhomë, të gjithë do ta kalonin dhe asnjë nuk do të rrëzohej, pasi fokusi i tyre do të ishte të kalonin këtë dërrasë. Por nëse të njëjtën dërrasë do ta vendosja dhjetë kate lart, midis dy ndërtesave. Atëherë vetëm pak do t’ia dilnin, sepse fokusi i tyre do të ishte tek rënia. Fokusi është gjithçka. Skuadra që sot është më e përqendruar, do ta fitojë këtë lojë.’
Johnson i tha skuadrës së tij të mos shpërqendrohej nga turma, media, apo mundësia e humbjes, por të përqendroheshin në çdo pjesë të lojës, sikur të ishin thjesht duke bërë stërvitje. Cowboys-at fituan lojën me rezultatin 52-17.
Kjo histori ka një pikë që shkon përtej futbollit. Shumica prej nesh e humbim përqendrimin në jetë, sepse shqetësohemi gjithmonë nga mundësitë negative. Në vend që të përqendrohemi te dërrasa ne shqetësohemi për gjithë pasojat e rënies. Në vend që të përqendrohemi në synimet tona, ne shpërqendrohemi nga shqetësimet dhe frikatë. Por kur përqendroheni në të qenit një person i lumtur dhe i motivuar, atëherë ky person do të bëheni.